Heilsupolitikkur fyri Føroyar 2026–2035

Ein nýggjur heilsupolitikkur fyri Føroyar er nú liðugur og handaður landsstýriskvinnuni í heilsumálum. Heilsupolitikkurin setur eina greiða og langskygda kós fyri føroyska heilsuøkið við langtíðarætlanum, ítøkiligum málum og visjónum fyri komandi árini.

Politikkurin er orðaður í breiðum samstarvi við heilsuverkið, kommunur, almannaøkið, sjúklingafeløg, starvsfólkabólkar, politiskar umboðanir og borgarar kring landið, og er grundaður á bæði fakliga vitan og íkast frá almenninginum.

Hvat er ein heilsupolitikkur?

Ein heilsupolitikkur er ein felags ætlan fyri, hvussu vit tryggja bestu heilsutænasturnar til allar føroyingar.
Politikkurin leggur lunnar undir eitt burðardygt og haldført heilsuverk, sum bæði megnar dagsins avbjóðingar og møtir framtíðar tørvi.

Visjónin er, at føroyska heilsuverkið skal vera á støði við bestu heilsuverkini í heiminum.

Hvat skal heilsupolitikkurin gera?

Heilsupolitikkurin hevur sum høvuðsendamál at:

• styrkja fyribyrging og heilsufremjan
• tryggja, at røtt og dygdargóð viðgerð verður veitt á røttum stað og til rætta tíð
• leggja støði undir politiskar, fakligar og almennar raðfestingar, sum styrkja vælferðina í samfelagnum
• tryggja, at heilsuverkið mennist burðardygt og haldført, so tað eisini í framtíðini kann veita dygdargóðar tænastur til allar borgarar.