04.03.2021 · Heilsumálaráðið

Felags ávísing til urolog riggar væl

Felags ávísing til urolog riggar væl

Royndirnar við felags ávísing í urologiini eru so góðar, at sama skipan skjótt fer at verða brúkt á øðrum viðgerðarøkjum í sjúkrahúsverkinum eisini. Ortopediin stendur væntandi næst fyri. Landsstýrismaðurin fegnast um, at góðu royndirnar bæði tryggja sjúklinginum bestu viðgerðina, stytstu bíðitíðina og leysgevur orku í sjúkrahúsverkinum

Síðani í fjør vár hevur ein felags ávísing virkað fyri sjúklingar við urologiskum sjúkum í Føroyum.

Felags ávísingin merkir, at í staðin fyri at kommunulæknarnir hvør í sínum lagi ávísa sjúklingar til urologisku deildirnar á teimum trimum sjúkrahúsunum, so verður ávísingin nú send til ein felags ávísingarpostkassa í sjúkrahúsverkinum.

Ávísingarpostkassin verður umsitin av einum serlækna í urologi, sum síðani metir um, hvat av sjúkrahúsunum hevur besta viðgerðartilboðið til tann einstaka sjúklingin og stytstu bíðitíðina.

Tá núverandi leiðsla í sjúkrahúsverkinum tók við í 2019, var beinanvegin gjørt av at skipa felags ávísing innan urologi í Føroyum.

Knúsing av nýrasteinum er ein viðgerð, sum rúgvar nógv upp í urologiini, tí lutfalsliga nógv fólk verða rakt av nýrasteini.

Landssjúkrahúsið veitir fleiri ymiskar tænastur innan urologi, men Klaksvíkar Sjúkrahús og Suðuroyar Sjúkrahús varða av tænastum innan nýrasteinsknúsing við hvør sínum viðgerðarhátti. Í Klaksvík hava tey síðani 2015 brúkt ultraljóð at knúsa steinarnar. Tað verður gjørt ambulant og uttan doyving. Í Suðuroy hava tey síðani 2018 brúkt lasertøkni til hesa viðgerð, sum verður latin sum dagskurðviðgerð, og sjúklingurin verður doyvdur.

Í sjúkrahúsverkinum siga tey, at skipanin við felags ávísing í urologiini riggar alsamt betri, tí tillagingar verða gjørdar so hvørt. Skipanin byrgir fyri óneyðugari bíðitíð og tryggjar, at sjúklingurin altíð fær tað besta viðgerðartilboðið á røttum stað. Hetta merkir eisini rasjonalisering í viðgerðini og økir tískil um generella kapasitetin í sjúkrahúsverkinum.

Við góðu royndunum innan urologiina er ætlanin skjótt at fáa felags ávísing innan onnur viðgerðarøki eisini. Her stendur ortopediin væntandi fyrst fyri.

Kaj Leo Holm Johannesen, landsstýrismaður í heilsumálum, fegnast um góðu royndirnar.

Felags ávísing til viðgerðartilboðini samsvarar ógvuliga væl við grundhugsanina um eitt sjúkrahúsverk og trý sjúkrahús undir einari felags leiðslu. Hetta er ein vinnarastøða fyri allar partar – ein serlækni tryggjar, at tað altíð verður ávíst til bestu viðgerðina, og í sjúkrahúsverkinum merkir rasjonaliseringin, at meira orka verður at viðgera yvirhøvur, so fleiri sjúklingar sleppa skjótari framat, sigur landsstýrismaðurin.