Í gjár var Margit Stórá, landsstýriskvinna í heilsumálum, á vitjan í Suðuroy.
Vitjanin byrjaði fyrrapartin á Suðuroyar sjúkrahúsi, har Steinar Eirikstoft, forstjóri í Sjúkrahúsverkinum, Hans Pauli Henryson, stjóri á Suðuroyar sjúkrahúsi og Gunnbjørg Guttesen, varastjóri á Suðuroyar sjúkrahúsi tóku ímóti landsstýriskvinnuni.
Víst varð runt á sjúkrahúsinum, landsstýriskvinnan fekk millum annað høvi at heilsa uppá starvsfólk á sjúkrahúsinum, og varð kunnað um, hvussu gongur við fyrireikingunum at skipa dialysuviðgerðir á Suðuroyar sjúkrahúsi.
Seinnapartin gekk leiðin fyrst oman á Seglloftið, har fundur var við borgarstjórarnar í Suðuroy. Endamálið við fundinum var at umrøða, hvussu tilboðini um heilsutænastur kunnu nýhugsast, so borgarar í Suðuroynni kunnu fáa tilboð um enn fleiri heilsutænastur í nærumhvørvinum.
At enda varð vitjað í læknamiðstøðini í Vági, har landsstýriskvinnan heilsaði uppá og prátaði við starvsfólkið í viðtaluni.
Mynd á sjúkrahúsinum:
Frá vinstru: Gunnbjørg Guttesen, Margit Stórá og Hans Pauli Henryson.
Mynd eftir fundin við borgarstjórarnar:
Frá vinstru: Jóanis Lisberg, borgarstjóri í Fámjin, Janus Thomsen, borgarstjóri í Hvalba, Bjarni Johansen, borgarstjóri í Vági, Margit Stórá, Ása Holm, borgarstjóri í Porkeri, Kristin Michelsen, borgarstjóri á Tvøroyri, Delmar Tausen, borgarstjóri í Hovi.