Nú fara tveir nýggir kommunulæknar afturat at verða settir í starv. Annar kommunulæknin verður settur í starv á Skálafjørðinum, meðan hin verður settur í starv í Suðurstreymi.
Løgtingið samtykti í dag at hækka játtanina til kommunulæknaøkið, so tað nú ber til at økja talið á kommunulæknastørvum við tveimum nýggjum størvum.
Sirið Stenberg, landsstýriskvinna, sigur í viðmerking, at hon fer beinanvegin at heita á Heilsutrygd um at lýsa størvini leys, so tey kunnu verða sett skjótast gjørligt.
Landsstýriskvinnan og borgarstjórarnir í Runavíkar-, Nes- og Sjóvar kommunum eru samd um, at ein av teimum nú tilsamans fýra kommunulæknunum í Skálafjarðar læknadømi fer at halda til í viðtaluhølunum á Strondum.
Økta talið á kommunulæknum fer eftir ætlan at hava við sær, at heilsutænastan til borgararnar í hesum økjum verða betri enn tey eru í dag. Sirið Stenberg fegnast um, at talið á kommunulæknum við hesum verður økt, samstundis sum tað er eydnast at fáa kommunulæknar í føst størv seinastu tíðina.